COMO UNHA ÁNCORA de Iria Collazo López

Naceu en Barro (Pontevedra) en 1981, pero leva no Morrazo (primeiro Moaña, agora Cangas) desde os sete anos. As historias que lIe contaron, que vive e que respira nestes dous lugares impregnan boa parte do que escribe.

Estudou Filoloxía Galega na Universidade de Vigo e titulouse co Premio Extraordinario Fin de Carreira. Ao ano seguinte aprobou as oposicións ao Ensino Secundario e hoxe exerce como profesora de Lingua e Literatura Galega.

Coma unha áncora, unha novela de amor, mar e xustiza é a súa primeira obra literaria publicada. A segunda chegou en 2016, A soidade das medusas, un conxunto de relatos enlazados que conta coas marabillosas ilustracións de Luz Beloso e que foi finalista dos Premios da Gala do Libro Galego dese mesmo ano.

Coma unha áncora é moito máis que unha historia mariñeira arredor dun naufraxio. Sobre todo, é unha novela de amor. Esa clase de amor que viaxa máis aló das fronteiras, da lóxica e do que coidamos normal. Neste libro atoparás momentos inesquecibles onde se manifestan o misterio e o inexplicable, mais tamén a vida con toda a súa forza, tanta, que vai por enriba da morte. Empezarás a ler e xa non vas poder parar. Prepárate para naufragar dentro dunha páxinas cheas de feitizo…

PREGUNTA: CANDO ESTARÁ MANUEL PREPARADO PARA VOLVER Á SUPERFICIE ?

VEN BUSCALO Á BIBLIOTECA!

ZIGZAG de Jordi Sierra y Fabra

Jordi Sierra i Fabra naceu en Barcelona, en 1947. Empezou a escribir aos oito anos e aos doce decidiu que a súa vocación era ser novelista. Con todo, seducido pola música rock, iniciou a súa andaina profesional como director dalgunhas das revistas musicais máis influentes en España (Disco Express, Popular I, etc…). Publicou máis de sesenta libros de historia e biografías de artistas do rock, e simultaneamente cultivou todos os xéneros literarios: relatos infantís, novela xuvenil e de adultos, ciencia ficción, humor, poesía, guións de película…. As súas obras non só obtiveron os máis prestixiosos galardóns, senón que tamén foron levadas á pantalla. É un viaxeiro incansable e traballa sen descanso. Actualmente dirixe a Fundación Jordi Sierra i Fabra (en Barcelona) e Taller de Letras (en Medellín, Colombia), para potenciar a vocación literaria entre os novos escritores.

Acción, intriga, personaxes decadentes propios do xénero negro… Onde está o límite entre o ben e o mal? Virgilio ten dezaoito anos e vaille ben na vida. Aproveita as mortes de cabaleiros adiñeirados para presentarse nas súas casas e, servíndose do desconcerto e a axitación, anunciar ás súas familias que é fillo do defunto. Sempre sae cun bo capital no peto. Ata o día que chega a casa de Héctor Adoitar, e as cousas cambian…

PREGUNTA: EN QUE CONTA ESTÁN OS 127 MILLÓNS DE EUROS?

VEN BUSCALO Á BIBLIOTECA!

A CAIXIÑA DOS RANCORES de Héctor Cajaraville

H

Héctor Cajaraville (Santiago de Compostela, 1974) estudou Xornalismo e actualmente é profesor de Lingua e Literatura galegas. En 2015 gañou o Premio Xerais coa súa primeira novela, De remate, e foi finalista do Premio Merlín de Literatura Infantil con Quen dá a quenda? (2016). Nese mesmo ano, a súa obra A caixiña dos rancores (2016) recibiu o Premio Raíña Lupa de Literatura Infantil e Xuvenil; en 2016 gañou o Premio Ánxel Fole de Narración Curta con Once portas (2017) e o Premio Meiga Moira de Literatura Infantil e Xuvenil con Denébola a Roxa. Coa súa novela Kusuma (2018) obtén o Premio Merlín de Literatura Infantil 2018.

A xuíza Felpeto, acabada de chegar á localidade costeira de Valdomar, revoluciona a vila coas súas orixinais sentenzas. Cando Estevo é obrigado a pasar todo o verán visitando a Chiruca, a anciá a que atropelara co seu ciclomotor, imaxina unhas soporíferas xornadas aturando as historias daquela muller que cruzara polo paso de cebra sen mirar. Pero todo cambia cando a casualidade fai que o mozo descubra un segredo que ten na súa cerna a Chiruca e que ela mesma descoñece.

PREGUNTA: CANTOS ANOS TEN AGORA A NAI DE CAROLINA?

VEN BUSCALO Á BIBLIOTECA !

TUERTO, MALDITO Y ENAMORADO de Rosa Huertas

Rosa Huertas é doutora en Ciencias da Información e licenciada en Filoloxía hispánica. Actualmente, é profesora de “Lengua y Literatura” no IES Gran Capitán de Madrid. Imparte obradoiros sobre creatividade e animación á lectura en diversas institucións. Publicou varios libros de recompilacións de contos, así como de cuestións didácticas e de fomento da creatividade. Coa súa primeira novela, Mala Luna, publicada en 2009, obtivo o Premio Hache de Literatura Xuvenil 2011. Coa segunda, Tuerto, maldito y enamorado, conseguiu o X Premio Alandar de Literatura Xuvenil en 2010. Gústalle escribir historias que falan do pasado e do presente, que mesturan a realidade e a ficción, e nas que os sentimentos traspasan as páxinas para emocionar os lectores.

Pode ser o amor unha maldición? A vida da mexericas Elisa cambia repentinamente o día que decide axudar a súa irmá a preparar un traballo de Literatura. Nos andeis da biblioteca do instituto habita un espectro chosco sobre o que pesa unha terrible maldición. Só ela pode liberalo, pero quizais sexa imposible: haberá que resolver algúns misterios e revelar unha historia de amor escondida na vida de Lope de Vega. As rúas de Madrid serán o escenario fantasmagórico da súa aventura, terrorífica e emocionante, máis alá da realidade.

PREGUNTA: CANTO TIVO QUE PAGAR ELISA POLAS DÚAS CANDEAS QUE LLE VENDEU A VIDENTE MORGANA?

VEN BUSCALO Á BIBLIOTECA !

A ARTE DE TROBAR de Santiago Lopo

Santiago Lopo (Vigo, 1974)  é escritor, tradutor e profesor de francés na Escola Oficial de Idiomas de Pontevedra. En 2006, gañou o Premio de Novela por Entregas de La Voz de Galicia, con Game Over. Con Hora zulú obtivo en 2012 o Premio Manuel García Barros de Novela, un dos galardóns máis prestixiosos das letras galegas. A súa obra, A diagonal dos tolos, conseguiu o Premio Repsol de Narrativa Breve en 2014, e con A arte de trobar, a súa quinta novela, o Premio Xerais de Novela 2017.

No século XIII, unha ” troupe ” de artistas itinerantes procedentes de Galicia percorre os reinos do Camiño de Santiago. É un momento de cambio político, cultural e lingüístico nunha Europa inmersa en cruentas loitas de poder. As persecucións relixiosas e as ansias expansionistas coinciden co auxe das cantigas galego-portuguesas e co declive da lírica provenzal. Un códice oculto, a Inquisición, a herexía cátara e os segredos da alquimia uniranse ás cantigas medievais para conformar unha engaiolante trama nunha novela con grandes doses de intriga.

PREGUNTA: COMO ACABA ISAHORT COA VIDA DE NUNO?

VEN BUSCALO Á BIBLIOTECA !

EL GUARDIAN ENTRE EL CENTENO de J.D. Salinger

J. D. Salinger (1919 – 2010) estudou nunha academia militar, e posteriormente nas Universidades de Nova York e Columbia. Durante a segunda guerra mundial serviu na mariña. Comezou a escribir relatos para revistas locais logo de licenciarse do exército en 1945. En 1951 publicou O vixía no centeo, a súa primeira e máis famosa novela. En gran parte autobiográfica, presenta a un adolescente, Holden Caulfield, que escapa da academia onde estuda para volver a Nova York. A novela escrita cun estilo e linguaxe propios dos adolescentes converteuse nun clásico. Posteriormente Salinger publicou as coleccións de relatos Nove contos en 1953; Franny e Zooey, en 1961; e Erguede, carpinteiros, a viga do tellado e Seymour: unha introdución, que apareceron xuntos en 1963, estes últimos protagonizados pola disfuncional familia Glass. Despois de conseguir fama e notoriedade con O vixía no centeo, Salinger converteuse nun eremita, apartándose do mundo e protexendo ao máximo a súa privacidade.

No vixía no centeo Holden Caulfield, o protagonista da novela, converteuse no prototipo do adolescente rebelde e confuso que busca a verdade e a inocencia lonxe do mundo falso dos adultos. Nunha confesión sincera, Holden desvélanos a realidade dun rapaz enfrontado ao fracaso escolar, ás ríxidas normas dunha familia tradicional, á experiencia da sexualidade,…

PREGUNTA: CANTOS CARTOS TEN HOLDEN NA SÚA CONTA BANCARIA ?

VEN BUSCALO Á BIBLIOTECA !

AS LÁGRIMAS DE SHIVA de César Mallorquí

AS LÁGRIMAS DE SHIVA de CÉSAR MALLORQUÍ

César Mallorquí (1953, Barcelona) é escritor, periodista e publicista. Comezou o seu traballo como xornalista na Cadena Ser.

Actualmente dedícase en exclusiva á literatura infantil e xuvenil e á novela negra.
César Mallorquí acadou numerosos premios, tanto con relatos de ciencia ficción como coa literatura xuvenil. Ademais foi recoñecido co Premio Nacional de Literatura Infantil y Juvenil de 2013.

No mesmo ano no que o home pisa a lúa por primeira vez, Xavier vai pasar o verán máis emocionante da súa vida. Xunto a Violeta deberá descifrar un enigma: o misterio dun obxecto moi valioso que estivo perdido durante sete décadas e que forma parte da historia familiar, As lágrimas de Shiva.

Amores prohibidos, estrañas desaparicións, vinganzas cruzadas e unha vella pantasma van enchendo de emoción as páxinas deste libro.

PREGUNTA: COMO SE CHAMA O BARCO NO QUE MARCHA BEATRIZ ?            VEN BUSCALO Á BIBLIOTECA !

GUEDELLAS DE SEDA E LIÑO de María Victoria Moreno

María Victoria Moreno (Cáceres, 1939 – Pontevedra, 2005), licenciada en Filoloxía Románica pola universidade de Madrid, en 1963 conseguiu unha praza de profesora nun instituto de Pontevedra, establecéndose en Galicia. A súa identificación co noso país foi tan intensa que de seguida aprendeu o galego e converteuno na súa lingua. Desde entón, toda a súa obra literaria está escrita en galego. Unha parte dela son contos e novelas dedicadas ao público infantil e xuvenil, como Leonardo e os fontaneiros, Mar adiante, O cataventos e Festa no faiado. A súa novela Anagnórise, obtivo un grande éxito entre os lectores, e figura na lista de honra do IBBY de 1990. Con Guedellas de seda e liño recibiu unha mención especial White Ravens 2002. Colaborou na redacción de libros de texto e dirixiu a colección “Árbore” da Editorial Galaxia dende 1988, ano da súa creación.

Guedellas de seda e liño  é unha novela chea de contrastes, na que a nobre delicadeza do ambiente pacego habitado polos seus protagonistas contrasta vivamente coa ruindade sempre ao axexo dalgúns personaxes que por alí roldan. Esta novela convídanos a compartir un mundo complexo, unhas veces radiante e outras veces noxento, que ten no amor a súa última e verdadeira xustificación.

PREGUNTA: QUEN FIXO A CHAMADA À GARDA CIVIL QUE PERMITIU A DETENCIÓN DE ELISARDO FAMÉRIDES?

VEN BUSCALO Á BIBLIOTECA!

PERSÉPOLIS de Marjane Satrapi

Persépolis é a autobiografía de Marjane Satrapi, unha muller iraniana nada en Teherán en 1969 no seo dunha familia progresista. Pero, ademais do retrato da vida da autora, tamén é o reflexo da revolución iraniana de 1979 que deu lugar a un goberno islámico e de como o viviron as familias do país. Desde o inicio, coa introdución do veo na vida social e a separación por sexos nas escolas, até a vida universitaria e as revoltas estudantís, Satrapi fai un repaso á súa vida que se remonta aos seus antepasados, axudándonos a entender as motivacións históricas da revolución islámica, mostrándonos á vez unha opinión crítica co goberno.

PREGUNTA: QUE PREGUNTA LLES FAN OS GARDIÁNS DA REVOLUCIÓN ÁS PARELLAS PARA SABER SE ESTÁN CASADOS?

VEN BUSCALO Á BIBLIOTECA !

OS NENOS DA VARIOLA de María Solar

María Solar (1970) naceu e vive en Santiago de Compostela. É presentadora do programa A revista fin de semana da TVG. Licenciouse en Xornalismo e Bioloxía ademais de ser diplomada en Maxisterio e ter o título de Especialista en Información Ecolóxica e Medioambiental. A súa actividade profesional sempre se centrou no xornalismo e ten unha longa traxectoria en radio e televisión. Na Radio Galega presentou e dirixiu durante oito anos o magacine As tardes da Galega e na TVG presentou diversos programas de todos os xéneros.. Ademais foi actriz de dobraxe. Como autora, céntrase no público infantil. No ano 2014 alzouse co Premio Lazarillo polo seu libro O meu pesadelo favorito, que entraría, en 2015, na Lista White Ravens da Biblioteca de Múnich.

Con Os nenos da varíola obtivo o Premio Fervenzas Literarias 2017 ao Mellor Libro Xuvenil do ano”

Sen dúbida, estamos diante da novela máis ambiciosa e lograda de María Solar. Desta volta achégase a unha das aventuras máis importantes da historia da humanidade, protagonizada por uns nenos que non tiñan idea de facerse heroes. Aínda que o foron. Nos seus pequenos corpos, brazo a brazo, levaron a vacina da varíola a América. Sacados dos hospicios da Coruña, Santiago e Madrid, cruzarán o Atlántico formando parte da Expedición do doutor Balmis e na que unha muller fascinante, Isabel Zendal, xogará un papel determinante. A historia comeza en 1803. Na miseria dos orfanatos. No medio dese universo cruel, a esperanza e un posible futuro. O heroísmo anónimo de 22 nenos que, grazas a este libro, xa non o serán máis

PREGUNTA: POR QUE EZEQUIEL NON VAI IR A AMÉRICA?

VEN BUSCALO Á BIBLIOTECA !