PERSÉPOLIS de Marjane Satrapi

Persépolis é a autobiografía de Marjane Satrapi, unha muller iraniana nada en Teherán en 1969 no seo dunha familia progresista. Pero, ademais do retrato da vida da autora, tamén é o reflexo da revolución iraniana de 1979 que deu lugar a un goberno islámico e de como o viviron as familias do país. Desde o inicio, coa introdución do veo na vida social e a separación por sexos nas escolas, até a vida universitaria e as revoltas estudantís, Satrapi fai un repaso á súa vida que se remonta aos seus antepasados, axudándonos a entender as motivacións históricas da revolución islámica, mostrándonos á vez unha opinión crítica co goberno.

PREGUNTA: QUE PREGUNTA LLES FAN OS GARDIÁNS DA REVOLUCIÓN ÁS PARELLAS PARA SABER SE ESTÁN CASADOS?

VEN BUSCALO Á BIBLIOTECA !

SOLOS de Gazzotti e Vehlman

Un novo día empeza como cada mañá en Fortville, pero… nada é coma antes. Os que espertaron esta mañá deambulan por unha cidade deserta até descubrir que só quedan cinco deles. Cinco nenos: Dodji, Leila, Celia, Iván e Terry. Que puido pasar ? Onde están os seus pais e os seus amigos ? Abandonados á súa sorte, desamparados e sen idea de que facer nunha cidade onte familiar, hoxe hostil. Parece que a tormenta agarda nesta mañá de verán e descubrirán pronto que a cidade lles reserva desagradables sorpresas. Os nosos protagonistas uniranse para enfrontar os numerosos e perigosos obstáculos que xurdirán na súa procura dunha explicación do ocorrido. Xuntos! O primeiro volume de Solos ofrece tres episodios e presenta o principio dunha serie que reunirá thriller, misterio e aventuras.

Traducida a media ducia de idiomas e vendida a máis dun millón de exemplares só en Francia, esta serie conta con 8 episodios publicados en Francia, o seu país de orixe. Premio do cómic 9-12 anos do Festival de Angoulême en 2007 e 2010. Dúas veces Gran Premio do Journal de Mickey, Premio Diagonale 2013 á mellor serie

PREGUNTA: QUE CASTIGO LLE PUXO SAÚL A DODGI POR TER UNHA ARMA ?

VEN BUSCALO Á BIBLIOTECA !

ALI BABÁ, MORXIANA E OS CORENTA USUREIROS de Marilar Aleixandre

Marilar Aleixandre (Madrid1947) é escritora e tradutora sobre todo en galego. Destaca na literatura infantil e xuvenil. De profesión é bióloga, na Universidade de Santiago de Compostela. Desde 2017 é membro da Real Academia Galega. Coa súa obra A banda sen futuro, 1999, obtivo o Premio Lazarillo e coa Teoría do caos, 2001, o Premio Xerais.

Era unha vez o xefe dunha banda de corenta ladróns. E un home bo que se chamaba Alí Babá. E unha cova chea de tesouros que abría cando alguén dicía: “Ábrete, sésamo!” Todos coñecemos a historia. Mais, o que ás veces se esquece é que a verdadeira protagonista é Morxiana, unha muller afouta que lle vai dar a volta ao mundo, e á historia tradicional, e vai salvar a súa familia e a vila toda. E, sobre todo, vai loitar contra os usureiros e os ditadores, e todos os que fan a fortuna erguéndose sobre os cadáveres dos máis febles e desafiuzados da historia. Marilar Aleixandre cóntanos o conto de sempre mais non coma sempre.

PREGUNTA: CANTAS VECES MORXIANA SALVA A ALÍ BABÁ E A SÚA FAMILIA?

VEN BUSCALO Á BIBLIOTECA !

OS NENOS DA VARIOLA de María Solar

María Solar (1970) naceu e vive en Santiago de Compostela. É presentadora do programa A revista fin de semana da TVG. Licenciouse en Xornalismo e Bioloxía ademais de ser diplomada en Maxisterio e ter o título de Especialista en Información Ecolóxica e Medioambiental. A súa actividade profesional sempre se centrou no xornalismo e ten unha longa traxectoria en radio e televisión. Na Radio Galega presentou e dirixiu durante oito anos o magacine As tardes da Galega e na TVG presentou diversos programas de todos os xéneros.. Ademais foi actriz de dobraxe. Como autora, céntrase no público infantil. No ano 2014 alzouse co Premio Lazarillo polo seu libro O meu pesadelo favorito, que entraría, en 2015, na Lista White Ravens da Biblioteca de Múnich.

Con Os nenos da varíola obtivo o Premio Fervenzas Literarias 2017 ao Mellor Libro Xuvenil do ano”

Sen dúbida, estamos diante da novela máis ambiciosa e lograda de María Solar. Desta volta achégase a unha das aventuras máis importantes da historia da humanidade, protagonizada por uns nenos que non tiñan idea de facerse heroes. Aínda que o foron. Nos seus pequenos corpos, brazo a brazo, levaron a vacina da varíola a América. Sacados dos hospicios da Coruña, Santiago e Madrid, cruzarán o Atlántico formando parte da Expedición do doutor Balmis e na que unha muller fascinante, Isabel Zendal, xogará un papel determinante. A historia comeza en 1803. Na miseria dos orfanatos. No medio dese universo cruel, a esperanza e un posible futuro. O heroísmo anónimo de 22 nenos que, grazas a este libro, xa non o serán máis

PREGUNTA: POR QUE EZEQUIEL NON VAI IR A AMÉRICA?

VEN BUSCALO Á BIBLIOTECA !

BALZAC Y LA JOVEN COSTURERA CHINA de Dai Sijie

Dai Sijie (Chengdú, Sichuan, China, 1954) é un cineasta e novelista chinés que vive en Francia. É coñecido sobre todo polas súas novelas Balzac y la joven costurera china escrita en francés no orixinal (premios Prix Edmée de La Rochefoucauld, Prix Relay du Roman d’Évasion e Prix des libraires du Québec do ano 2000) e por El complejo de Di que recibiu o Premio Femina en 2003.

Fillo de médicos, os seus pais foron encarcerados durante a Revolución Cultural de Mao Zedong e el foi enviado a reeducarse nun pequeno pobo da provincia de Sichuan. En 1974 ingresou na universidade para cursar Historia da Arte e cuatro anos despois nunha escola de cine, onde obtén unha beca para estudar no estranxeiro. Traballou nun instituto de provincias ata a morte do presidente Mao Zedong. Para proseguir os seus estudos, o goberno decidiu mandalo a Francia e instalouse alí en 1984. A súa primeira longametraxe, Chine ma douleur (1989) valeulle o Premio Jean Vigo.

En Balzac y la joven costurera china, dous adolescentes chineses son enviados a unha aldea perdida nas montañas, cerca da fronteira co Tíbet, para cumprir co proceso de «reeducación» imprantado por Mao Zedong a finais dos anos sesenta. Soportando unhas condicións de vida infrahumanas, cunhas perspectivas case nulas de regresar algún día á súa cidade natal, todo cambia coa aparición dunha maleta clandestina chea de obras emblemáticas da literatura occidental. Así, grazas á lectura de Balzac, Dumas, Stendhal ou Romain Roland, os dous mozos descubrirán un mundo repleto de poesía, sentimentos e paixóns descoñecidas, que se convertirá nun instrumento valiosísimo para conquistar á atractiva filla do xastre do pobo veciño.

PREGUNTA: QUE LIBRO LLE ENCONTRARON OS GARDAS VERMELLOS AO PASTOR, ESCONDIDO DEBAIXO DA ALMOFADA?

VEN BUSCALO Á BIBLIOTECA !

EL CORAZON Y LA ESPADA de Rocío Rueda

Rocío Rueda Sastre (Saldaña, Palencia, 1978) é fisioterapeuta, pero compaxina este traballo coa súa paixón pola literatura e a escritura. As súas obras nas que mestura aventura e historia teñen unha importante repercusión entre o público xuvenil: El escarabajo de Horus (2008), ambientada no Antigo Exipto, ou El brazalete mágico (2010), ambientada na Grecia Antiga.

En El corazón y la espada, Jimena, filla do cabaleiro Gonzalo de Montalvo, permanece no castelo da vila de Saldaña ao coidado da súa ama de cría Teresa, ata que o seu pai volva do campo de batalla. A moza soña cun futuro moi diferente ao que lle espera entre os muros do castelo. A elección da vila de Saldaña para celebrar os esponsais do rei de Castela cambiará os plans de Jimena. Xa que, debido a unha conspiración contra o monarca, verase obrigada a fuxir, non só para salvar a vida, senón para limpar o nome do seu pai. Conseguirá sobrevivir soa e lograr que se esclareza a verdade?

PREGUNTA: QUE ESCUSA LLE PON JIMENA A RAMIRO PARA QUE NON MARCHE DO SEU LADO?

VEN BUSCALO Á BIBLIOTECA !

CIELO ABAJO de Fernando Marías

Fernando Marías (Bilbao, 1958) é escritor e guionista de cine e televisión. En 1975, trasladouse a Madrid para estudar Cinematografía. A súa primeira novela, La luz prodigiosa (1990) gañou o Premio Ciudad de Barbastro. En 2001, coa novela El niño de los coroneles, gañou o premio Nadal, o que potenciou considerablemente a súa carreira. Marías obtivo algúns dos Premios literarios españois máis importantes, destacando o Premio Nadal de 2001, o Ateneo de Sevilla de 2005, o Dulce Chacón de Narrativa de 2005 e o Nacional de Literatura Infantil e Xuvenil de 2006 con Cielo abajo.

O 7 de novembro de 1936, tivo lugar o primeiro asalto das tropas franquistas contra o Madrid republicano. Esta novela relata esta batalla na que se produce a loita entre dous aviadores que foron amigos e que pertencen a bandos opostos. Fernando Marías cóntaa desde os dous lados, a través dos ollos dun home que traizoa a ambos os dous bandos. O autor emprega o suspense para atrapar o lector con amores que perduran de por vida, amigos que se traizoan e batallas da aviación de guerra. Combina os dous tempos nos que se narra a historia: o presente Madrid moderno e deshumanizado, e a cidade asustada do 36 na que a solidariedade e a valentía do pobo se mesturan co seu profundo medo ante os bombardeos aéreos.

PREGUNTA: EN QUE MES E ANO MORRE JAVIER ÁLVAREZ?

VEN BUSCALO Á BIBLIOTECA !

KAFKA Y LA MUÑECA VIAJERA de Jordi Sierra i Fabra

Jordi Sierra i Fabra naceu en Barcelona en 1947. Leva máis de 30 anos escribindo e a súa obra, que supera os 300 libros, abrangue todo tipo de xéneros desde a poesía ata a narrativa, o ensaio, a historia e a biografía. Pola súa creación literaria recibiu numerosos premios, pero Kafka y la muñeca viajera é segundo algúns críticos a obra mestra de Sierra i Fabra, e con ela gañou o Premio Nacional de Literatura Infantil e Xuvenil de 2007.

Neste relato, o autor a partir dun feito real crea unha historia tenra e doce onde a esperanza é posible.

O Escritor checo Franz Kafka (1883-1924) cando paseaba por un parque de Berlín, atopou unha nena que choraba desconsolada porque perderá a súa boneca. Diante de tanta tristura, Kafka decide inventar unha historia na que a boneca non está perdida senón que marchou de viaxe. Deste xeito, Franz vai se converter en “Carteiro de Bonecas” para devolverlle a ilusión a unha nena descoñecida

PREGUNTA: POR QUE MOTIVO A BONECA QUEDA EN TANZANIA?

VEN BUSCALO Á BIBLIOTECA!!!

BALA PERDIDA de Manuel Rivas

Manuel Rivas (A Coruña, 1957) é escritor, poeta, ensaísta e periodista. Desenvolve a súa obra principalmente en galego aínda que a miudo, el mesmo fai as traducións ao castelán, lingua na que escribe artigos para o periódico El País. En 2009, foi elixido membro da Real Academia Galega.

Por outra banda, foi socio fundador de Greenpeace en España e participou na creación da plataforma cidadá Nunca Mais durante o desastre do Prestige.

Levou numerosos premios polas súas obras literarias e varias foron adaptadas ao cine como A lingua das volvoretas, O lapis do carpinteiro ou Todo é silencio.

Bala Perdida é o último pirata do Atlántico Norte. Para resolver unha misteriosa abordaxe na costa da Morte, contacta coa redactora do periódico da cidade de Atlán. Xuntos, van se embarcar nunha perigosa aventura que deparará algunhas sorpresas.

PREGUNTA: PARA QUE BALA PERDIDA NECESITA A GANSO SALVAXE?

VEN BUSCALO Á BIBLIOTECA!

AS SETE MORTES de Carlos Vila Sexto

AS SETE MORTES de CARLOS VILA SEXTO

Carlos Vila Sexto ( A Coruña, 1977) comezou a escribir de rapaz e con catorce anos gañou o V Premio de Narracións Infantís Rúa Nova co relato de aventuras Alén da aventura (1992). Repetiu premio ao ano seguinte coa novela de terror Gárgola (1993). En 1995 publicou Cara á fin da luz, unha novela de misterio, aventuras e terror ambientada nunha aldea. Un relato seu, O baúl, foi incluído na Antoloxía do conto de medo galego. En marzo de 2009 publica As sete mortes, unha aventura con tintes de misterio e terror.

Carlos Vila Sexto tamén destaca como guionista coas series de televisión Los Misterios de Laura (TVE), Motivos Personales (Telecinco) e Un lugar en el mundo (Antena 3). A súa serie Los Misterios de Laura foi a primeira na historia da televisión en España en ser adaptada en Estados Unidos (The Mysteries of Laura), producida por Warner para a cadea NBC, e protagonizada pola actriz Debra Messing

Xacobe é un home especial que traballa para un traficante de droga e ten que meterse pastillas todos os días. As feridas rexenéranse, sobrevive a todos os ataques e xa perdeu a conta dos anos que ten. Todo vai cambiar cando un vello chega á súa casa e morre no momento no que lle entrega unha mensaxe. Aquí comeza unha aventura especial para descifrar quen é, por que é inmortal, quen era o vello…

PREGUNTA: QUEN TRAIZOOU A XACOBE E NATALIA ? 

VEN BUSCALO Á BIBLIOTECA !