MARXINADOS de Pepe Carballude

Pepe Carballude é catedrático de Latín no Instituto de Ensino Secundario ” Xosé Neira Vilas ” de Perillo-Oleiros, A Coruña. Compaxina o exercicio da investigación e tradución coa creación no ámbito da literatura infantil e xuvenil. Convén citar: O xílgaro pintor (1987); Investigación 091 (2007); O talismán dos druídas (1989); Andainas de Pedro Chosco (1989); Os enredos de Olalla (1990); O deus desaparecido (1991), premio Barco de Vapor, escrita en colaboración con Andrés García Vilariño; A fraga misteriosa (1992); S.O.S. (1994); Romaxe de desventuras; ¡Maldito D.N.I.! (1998); Mimos e máis mimos (1999); Andrea quere ser maior (1999); Paisaxe con fondo gris (2001).

Marxinados (2014) é unha historia de persoas que viven, dalgunha maneira, fóra do mundo. Pero que tamén queren cambialo. Fálanos dunha estrela do baloncesto que un día decide rematar a súa carreira e ir traballar como educador ao internado onde tamén el foi criado. Está alí para botar unha man a nenos e nenas que, coma el, foron excluídos por unha realidade que os puxo fóra: pais e nais atrapados na miseria, nas drogas, nos problemas duros do lado máis feo do mundo. Pero tamén está alí chamado por unha historia de amor. Unha novela para pensar nas persoas que non poden facer nada por cambiar as cousas. Pero tamén unha novela para pensar nas persoas que as cambian, para mellor, todos os días.

PREGUNTA:EN QUE POSTO QUEDA ROMÁN NA FASE INTERNACIONAL DA OLIMPIADA DE FÍSICA?

VEN BUSCALO Á BIBLIOTECA !

CORAZÓN DE CHOCOLATE de Jaureguizar

Jaureguizar naceu en Bilbao en 1965. Veu para Galiza coa súa familia sendo un neno e considérase medio vasco medio galego. En 1993 comezou a traballar de xornalista no diario lugués El Progreso, profesión que segue exercendo. Como narrador ten publicados os seguintes libros: “Fridon spik” (1995), “Comendo espaguetis diante da televisión” (1998), “As horas sucias” (2001), “Breve crónica universal da clase obreira” (2001), Premio Lueiro Rey 2001, “Casa Skylab” (Premio Xerais 2003), “Cabaret Voltaire” (Premio Manuel García Barros 2005), “O Globo de Shakespeare” (Premio Terra de Melide, 2008) e “Placebo” (2016). É autor, ademais, de numerosas novelas xuvenís entre as que destaca a serie de novelas protagonizada polo mozo detective Tintimán: “Corazón de chocolate. Un misterio para Tintimán en Compostela” (2010), “A coroa de napoleón. Un misterio para Tintimán na Coruña”, “Amor de Serea. Un misterio para Tintimán en Vigo” (2012), etc

Tintimán, un rapaz de dezaseis anos arrichado e algo insolente, herdou do seu pai a paixón por investigar misterios, o amor pola aventura e un axitado traballo de xornalista. En Corazón de chocolate, a cidade de Santiago de Compostela é un escenario emocionante e arriscado para o primeiro misterio que ten que descubrir. O reporteiro investigará se realmente existe a Irmandade Xelmírez, unha seita perversa, ou se só é unha lenda. Señor Grozni, un gato cun parche nun ollo, e Mónica, unha amiga que asegura ser a súa moza, achegaranlle a axuda precisa para que Tintimán descubra a verdade.

PREGUNTA: QUEN CAZABA OS GATOS?

VEN BUSCALO Á BIBLIOTECA !

LA PROFECÍA DEL ABAD NEGRO de José María Latorre

José María Latorre (1945-2014), ademais do seu labor á fronte das revistas Dirigido por e Imágenes de Actualidad, tamén exerceu como crítico de cinema noutras publicacións como Film Ideal, Nosferatu, ABCD, Diario 16 ou La Vanguardia. Conta no seu haber con máis dunha trintena de libros. Na súa bibliografía hai narrativa xuvenil, novela e relatos de terror e tamén ensaio cinematográfico. Dese xeito, combinou as súas dúas afeccións. O seu último libro é “La maldición de la banshee” (2013). Tamén exerceu puntualmente de guionista en títulos como “Denver” de Carlos Balagué (1985) e “Barcelona, lament” de Luis Aller (1990).

Ada Boyle acepta un traballo como profesora de literatura nun colexio próximo a unha antiga abadía. Desta cóntanse escuras lendas, como que aínda habita nas súas abandonadas torres un Abade que se dedicaba a practicar ritos demoníacos para transformarse en vampiro. Ada e dous dos seus alumnos intentarán facerlle fronte, pois as súas vidas corren perigo. Historia con todos os elementos propios da novela gótica: lenda, profecía, presenza de forzas malignas, ritos satánicos, paisaxes brumosos, cemiterios abandonados…

PREGUNTA:QUE MODELO DE COCHE TEÑEN CAMILLE E GEOFFREY NO GARAXE?

VEN BUSCALO Á BIBLIOTECA !

CHARLIE Y LA FÁBRICA DE CHOCOLATE de Roald Dalhl

Tim Burton, director de ”Charlie y la fábrica de chocolate” que
levou ao cinema esta obra de Roald Dalhl dixo del: ”Roald Dahl foi un
deses raros autores que non subestiman aos seus lectores: sabía
falarlles no seu propio código, coma se fosen adultos. Non temía ser
subversivo e lograba ser luminoso e escuro ao mesmo tempo”.
O señor Wonka escondeu cinco billetes de ouro nas súas
chocolatinas. Quen os atope serán os afortunados que visiten a súa
magnífica e misteriosa fábrica de chocolate. Charlie quere ser un
deses nenos, pero como fará para obter un billete dourado? Cal é o
verdadeiro propósito do señor Wonka?

PREGUNTA: CANTOS ESQUÍOS SUXEITABAN CADA MEMBRO DE VERUCA ?
VEN BUSCALO Á BIBLIOTECA !

O PINTOR DO SOMBREIRO DE MALVAS de Marcos Calveiro

Marcos Calveiro (1968, Vilagarcía de Arousa) reside en Vigo onde traballa como avogado. Deuse a coñecer no eido da literatura infantil e xuvenil no que acadou numerosos galardóns. Tamén escribiu poesía e en 2008 publicou a súa primeira novela dirixida a un público adulto, Festina lente. Coa obra O pintor do sombreiro de malvas recibiu o Premio Lazarillo de Literatura Xuvenil 2009.

Un adolescente é enviado pola súa nai a pasar unha tempada cunha tía na vila de Auvers. Transcorre o verán de 1980 e o rapaz vai coincidir co pintor Van Gogh durante dous meses. Entrambos xorde unha relación que os fai inseparables. O mozo convértese no guía do artista e xuntos percorren a contorna e comparten as súas angurias persoais. Marcos Calveiro reproduce con grande mestría os acontecementos, os ambientes e os personaxes a través dunhas descricións magníficas polo seu detalle coma se estivese a pintar un cadro.

PREGUNTA: QUEN FOI O MÉDICO QUE LLE CORTOU A PERNA A PIERRE DURANTE A GUERRA?

VEN BUSCALO Á BIBLIOTECA !

TODO O TEMPO DO MUNDO de David Pérez Iglesias

David Pérez Iglesias(Ames, 1962) é escritor, guionista e profesor de lingua e literatura no IES de Porto do Son. Como narrador publicou os libros O pergameo de Elir (1987); Estación Término (1993), premio de relato Cidade de Lugo; e Cando veña a noite (2005), premio Antón Avilés de Taramancos. Algúns dos seus relatos forman parte de obras colectivas como «Samago, Fascismo» de Tecendo Panos (2000), premio Manuel Murguía de narracións breves; «Mares do Sur» de Paisaxes e palabras (2001) e «Vidros» de A garza insomne (2016). Coordina o proxecto “Son cine” de introdución do audiovisual na escola, traballo de innovación educativa polo que foi premiado pola Consellaría de Educación e a ASPG. Con Todo o tempo do mundo obtivo o Premio Merlín de Literatura Infantil 2016.

Ariadna lembra aqueles vinte días felices que pasaron entre a mañá en que chegou á aldea na furgoneta dos panadeiros e a mañá en que Valente, o seu avó, a deixou no aeroporto, camiño de Canadá, onde emigraron os seus pais despois de ser despedidos do traballo. Días inesquecibles de verán nos que esta rapaza de case doce anos aprendeu na casa da Albariza o nome de cada unha das árbores e a identificar o son do río e da fervenza, do merlo e do paspallás.

PREGUNTA: CANTOS ANOS TIÑA O PAI DE ARIADNA CANDO ESCRIBIU O SEU NOME NAS PEDRAS DO VALO DO ADRO QUE ARRODEA A IGREXA? VEN BUSCALO Á BIBLIOTECA !

COMO UNHA ÁNCORA de Iria Collazo López

Naceu en Barro (Pontevedra) en 1981, pero leva no Morrazo (primeiro Moaña, agora Cangas) desde os sete anos. As historias que lIe contaron, que vive e que respira nestes dous lugares impregnan boa parte do que escribe.

Estudou Filoloxía Galega na Universidade de Vigo e titulouse co Premio Extraordinario Fin de Carreira. Ao ano seguinte aprobou as oposicións ao Ensino Secundario e hoxe exerce como profesora de Lingua e Literatura Galega.

Coma unha áncora, unha novela de amor, mar e xustiza é a súa primeira obra literaria publicada. A segunda chegou en 2016, A soidade das medusas, un conxunto de relatos enlazados que conta coas marabillosas ilustracións de Luz Beloso e que foi finalista dos Premios da Gala do Libro Galego dese mesmo ano.

Coma unha áncora é moito máis que unha historia mariñeira arredor dun naufraxio. Sobre todo, é unha novela de amor. Esa clase de amor que viaxa máis aló das fronteiras, da lóxica e do que coidamos normal. Neste libro atoparás momentos inesquecibles onde se manifestan o misterio e o inexplicable, mais tamén a vida con toda a súa forza, tanta, que vai por enriba da morte. Empezarás a ler e xa non vas poder parar. Prepárate para naufragar dentro dunha páxinas cheas de feitizo…

PREGUNTA: CANDO ESTARÁ MANUEL PREPARADO PARA VOLVER Á SUPERFICIE ?

VEN BUSCALO Á BIBLIOTECA!

DENÉBOLA A ROXA de Héctor Cajaraville

Héctor Cajaraville (Santiago de Compostela, 1974) estudou Xornalismo e actualmente é profesor de Lingua e Literatura galegas. En 2015 gañou o Premio Xerais coa súa primeira novela, De remate, e foi finalista do Premio Merlín de Literatura Infantil con Quen dá a quenda? (2016). Nese mesmo ano, a súa obra A caixiña dos rancores (2016) recibiu o Premio Raíña Lupa de Literatura Infantil e Xuvenil; en 2016 gañou o Premio Ánxel Fole de Narración Curta con Once portas (2017) e o Premio Meiga Moira de Literatura Infantil e Xuvenil con Denébola a Roxa. Coa súa novela Kusuma (2018) obtén o Premio Merlín de Literatura Infantil 2018.

O 15 de marzo de 1600, o mesmo día en que fai quince anos, Denébola recibe a noticia de que o seu pai decidiu enviala como noviza a un convento de clausura. Pero a moza, que comparte nome cunha das estrelas máis brillantes da constelación de Leo, loitará por un futuro máis luminoso ca este que o seu pai, o poderoso señor de Mourentán, elixiu para ela. Marcada pola superstición asociada á súa cabeleira roxa, buscará o modo de rexerse polos seus propios principios e tomar as rédeas do seu destino.

PREGUNTA: CAL É O VERDADEIRO MOTIVO POLO QUE “O FINÉS”DECIDE ATACAR O GALEÓN AO CUARTO DÍA DE ESPERA?

VEN BUSCALO Á BIBLIOTECA !

EL CORSARIO NEGRO de Emilio Salgari

Mito e realidade aparecen entrelazados na biografía de Emilio Salgari (Verona, 1862 – Turín, 1911): a súa vida estivo dedicada á literatura, fracasou vitalmente cando non puido conseguir o título de capitán de gran cabotaxe e só realizou unha breve viaxe como turista. Comezou a publicar aos vinte e un anos e, desde entón ata a súa morte, desenvolveu un labor frenético por manter a súa muller e aos seus catro fillos. Con todo, viviu unha situación precaria e o esgotamento psíquico levouno ao suicidio. Entre a súa inxente obra literaria, podemos destacar, La cimitarra de Buda (1892), Los piratas de Malasia (1896), El Corsario Negro (1898) ou Los tigres de Mompracem (1900).

A vinganza, o amor a unha duquesa flamenca e a fidelidade ao xuramento dado son os tres elementos que condicionan o comportamento do protagonista, o cabaleiro Emilio di Roccanera, o Corsario Negro. A acción, as aventuras e os sentimentos dos personaxes desta magnífica novela de piratas «apresarán» entre as súas páxinas aos lectores.

PREGUNTA: EN QUE PAÍS ESTÁ A SELVA QUE ATRAVESAN O CORSARIO NEGRO E OS SEUS HOMES?

VEN BUSCALO Á BIBLIOTECA !

ZIGZAG de Jordi Sierra y Fabra

Jordi Sierra i Fabra naceu en Barcelona, en 1947. Empezou a escribir aos oito anos e aos doce decidiu que a súa vocación era ser novelista. Con todo, seducido pola música rock, iniciou a súa andaina profesional como director dalgunhas das revistas musicais máis influentes en España (Disco Express, Popular I, etc…). Publicou máis de sesenta libros de historia e biografías de artistas do rock, e simultaneamente cultivou todos os xéneros literarios: relatos infantís, novela xuvenil e de adultos, ciencia ficción, humor, poesía, guións de película…. As súas obras non só obtiveron os máis prestixiosos galardóns, senón que tamén foron levadas á pantalla. É un viaxeiro incansable e traballa sen descanso. Actualmente dirixe a Fundación Jordi Sierra i Fabra (en Barcelona) e Taller de Letras (en Medellín, Colombia), para potenciar a vocación literaria entre os novos escritores.

Acción, intriga, personaxes decadentes propios do xénero negro… Onde está o límite entre o ben e o mal? Virgilio ten dezaoito anos e vaille ben na vida. Aproveita as mortes de cabaleiros adiñeirados para presentarse nas súas casas e, servíndose do desconcerto e a axitación, anunciar ás súas familias que é fillo do defunto. Sempre sae cun bo capital no peto. Ata o día que chega a casa de Héctor Adoitar, e as cousas cambian…

PREGUNTA: EN QUE CONTA ESTÁN OS 127 MILLÓNS DE EUROS?

VEN BUSCALO Á BIBLIOTECA!